Подобрување на оценувањето на учениците

Проектот за основно образование (ПЕП) ќе обезбеди поддршка на напорите на Министерството за образование и наука за унапредување на оценувањето на учениците во основните училишта. Преку проектот е планирано да се изгради и воведе систем за формативно оценување во училиштата со што:

ќе се обезбедат постапки и инструменти за оценување што ќе им бидат достапни на наставниците и ќе можат лесно да ги користат;

ќе биде компатибилен со националното оценување на постигањата на учениците во Македонија.

Во компонентата за оценување ќе се работи на следниве подрачја:

1. Развој на стандарди за оценување во училиштата, вклучувајќи и етички кодекс во оценувањето
Стандардите треба да бидат усвоени на државно ниво. Важна компонента на овие стандарди ќе биде секое училиште нив да ги преточи во етички кодекс за оценување. На тој начин ќе се зајакнува праксата на валидно, објективно и фер оценување. Стандардите за оценување и етичкото однесување ќе им помогнат и на родителите да го разберат начинот на оценување, критериумите што се користат како и да го толкуваат степенот на успех на нивното дете, избегнувајќи ситуации во кои може да се посомневаат во пристрастност и необјективност.

2. Стручно усовршување за наставниците и за другиот воспитно-образовен кадар во училиштата
Сиот воспитно-образовен кадар во училиштата ќе добие обука за примена на стандардите за оценување. Наставниците во предметна настава, покрај тоа, ќе добијат обука за изготвување на тестови, користење на различни постапки и инструменти на оценување, за интерпретирање и за користење на резултатите од националните и меѓународните мерења на постигањата на учениците.
Со цел да се опфатат што поголем број теми од оценувањето и да се обезбедат обуки за сите наставници, ПЕП ќе спроведува комбинација на обуки на национално и регионално ниво, како и обуки на ниво на училишта.

3. Создавање на стручни материјали (во пишана и електронска форма) како начин за долгорочна стручна поддршка
Наставниците кои ќе бидат најкреативни во текот на примената на различни методи и техники за оценување, ќе бидат избрани како лидери и ќе работат со ПЕП на развивање на пишани и дигитални образовни материјали, упатства за обука и инструменти за оценување кои ќе им бидат достапни на наставниците и ќе можат да ги користат за обуките на ниво на училиште и во секојдневната практика. Тие ќе работат и на собирање на тест прашања и создавање на бази на прашања за изготвување на тестови за потребите на наставниците, како и на база на различни видови инструменти за оценување.

Почетна / Дискреција / Контакт / Веб дизајнер

©2007 УСАИД Проект за Основно Образование

УСАИД • АЕД